KISA BARUA AUWAWA

Mwanafunzi auawa baada ya kukutwa na barua ya mapenzi

MWANAFUNZI wa Kidato cha Pili, Jofrey Robert Mwakatenya (15) anatuhumiwa kuuawa kikatili na baba yake mzazi, Robert Mwakatenya (35) baada ya kumkuta akiwa na barua ya mapenzi, inayodaiwa aliandikiwa na rafiki wake wa kike.

 

Mzazi huyo ambaye ni mfanyabiashara na mkazi wa eneo la Majengo ‘D’ Manispaa ya Sumbawanga, anadaiwa kumwadhibu mwanafunzi huyo, ambaye ni mtoto wake wa kwanza kwa kupiga ngumi na mateke mfululizo kwa zaidi ya saa tatu.

 

Kamanda wa Polisi Mkoa wa Rukwa , Jacob Mwaruanda alithibitisha tukio hilo, lilitokea usiku wa kuamkia Jumapili iliyopita. Alisema bado wanamtafuta mtuhumiwa huyo kwani baada ya kufanya kitendo hicho alitokomea.

 

Akizungumza na mwandishi wa habari hizi, Mwenyekiti wa Serikali Majengo D, Antony Nyambo alidai kuwa mzazi huyo alikuwa na tabia ya kumwadhibu mwanawe huyo, akimtuhumu kuwa ni mtoro wa shule .

 

“Nilitaarifiwa juu ya kisa hiki Jumapili saa mbili asubuhi baada ya kutoka katika ibada na raia mwema, ndipo niliamua kufika nyumbani kwa marehemu, nilimkuta akiwa amelazwa chumbani, nilipomfunua niliona akiwa ametapakaa vumbi mwili mzima huku akiwa amevaa nguo ya ndani tu,” alidai mwenyekiti huyo wa mtaa.

 

Inadaiwa kuwa usiku huo wa tukio, mtuhumiwa alianza kumwadhibu kumpiga ngumi na mateke kuanzia saa mbili usiku hadi usiku wa manane.

 

Mtoto huyo baada ya kupata kipigo hicho, alizimia ambapo baba yake alimwagia maji mwilini hadi akazinduka, kisha akamwamuru alale chumbani humo pamoja na mdogo wake.

 

Mzazi wa mtoto huyo alidamka alfajiri na kwenda kwenye chumba walicholala watoto hao na kugundua kuwa Jofrey alikuwa mfu.

 

“Ndipo baba huyo alipoaga nyumbani hapo, akidai kuwa anaenda kutafuta gari ili Jofrey aweze kupelekwa hospitalini kwa matibabu. Mzazi huyo hakurudi tena nyumbani kwake hadi sasa,” alibainisha.

CHANZO Mpekuzi blog 

 

POSTED BY ANNASTAZIA JR

PESA ZETU

Sarafu ya Sh 500 YAHUJUMIWA....... Yanunuliwa kwa Sh. 2500 hadi 5000 ili Kutengeneza Mikufu, Benki Kuu Ya Tanzania (BoT) Yatoa Tamko

SARAFU mpya ya shilingi 500 inadaiwa kuhujumiwa na baadhi ya watu ambao huinunua kwa Sh 2,500 na baadaye kuiyeyusha kwa ajili ya kutengenezea mikufu ya fedha (silver).

 

Taarifa ambazo tumezipata kutoka vyanzo mbalimbali zinaeleza tangu sarafu hizo zilipotolewa kwa mara ya kwanza Oktoba mwaka jana, baadhi ya watu wamekuwa wakizikusanya na kuzifanya kuadimika mtaani.

 

Imeelezwa kuwa tangu kutolewa kwa sarafu hiyo imekuwa adimu mitaani jambo ambalo si kawaida kwa fedha mpya zinazoingizwa kwenye mzunguko kuadimika kwa kiwango hicho.

 

“Nimekutana na watu watatu wakitafuta sarafu ya Sh 500 kwa Sh 2,500 hadi 5,000, mwanzoni nilipuuza lakini baada ya kutulia na kufanya utafiti nimegundua kwamba kwanza hii sarafu imekuwa adimu na inatafutwa kwa udi na uvumba,” kilisema chanzo chetu cha habari jijini Dar es Salaam.

 

Alipoulizwa kupitia simu yake ya kiganjani kuhusu hujuma hizo, Meneja Sarafu wa Benki Kuu ya Tanzania (BoT), Jovent Rushaka, alisema taarifa hizo wanazo na wanazifanyia kazi.

 

“Taarifa hizo tumezipata juzi na tunalifanyia kazi suala hilo, kwa sasa tunafanya uchunguzi zinakofanyiwa kazi, zinakouzwa ili tuweze kwenda katika maduka hayo na kufanya uchunguzi,” alisema Rushaka.

 

Katika hatua hiyo, meneja huyo aliwataka Watanzania kwa yeyote atakayebaini sehemu zinakotengenezwa na kuuzwa atoe taarifa.

 

Alipoulizwa kuhusu aina ya madini iliyotengenezewa sarafu hiyo ya Sh 500, alisema imetengenezwa kwa madini ya chuma kwa asilimia 94.

 

“Asilimia sita iliyobaki imetengenezwa kwa madini aina ya nickel plated silver ambayo kidogo unaweza kutengenezea mikufu ya ‘silver’. Sasa ni mtu gani anayenunua madini ya chuma ni vigumu kuwezekana sasa, maswali ya kujiuliza ni je, imetengenezwa na hiyo nickel plated silver?” alihoji Rushaka.

  Alipoulizwa sababu za sarafu hiyo kuadimika imetokana na nini, alisema BoT ilitoa sarafu hiyo tangu Oktoba mwaka jana na kwamba bado wanazo nyingi.

 

“Tangu Oktoba mwaka jana tumezitoa nyingi kupitia Commercial Bank (benki za biashara) na kama kuna mtu anahitaji aende kwenye benki hizo halafu atapewa kwa sababu sisi tunasambaza kupitia benki hizo,” alisema Rushaka.

 

Hata hivyo taarifa iliyotolewa kwa vyombo vya habari na BoT jana ilisema asilimia 94 ya madini katika sarafu ya Sh 500 ni chuma na asilimia 6 ni Nickel.

 

Taarifa hiyo iliyotolewa na Mkurugenzi wa Huduma za Kibenki BoT, Marcian Kobello ilieleza kuwa hadi sasa sarafu za Sh 500 zenye thamani ya zaidi ya Sh bilioni moja zimesambazwa kote nchini.

 

Pia aliongeza kuwa Nickel sio miongoni mwa madini maarufu kwa ajili ya kutengeneza vidani vya thamani.

 

“Hakuna kabisa madini ya fedha katika sarafu ya shilingi 500,” alisema Kobello na kuongeza kuwa haitegemewi kwamba mfanyabiashara yeyote anaweza kununua sarafu hiyo kwa bei ya juu kuliko thamani yake halisi.

 

“Kwa hiyo, tunapenda kuwafahamisha wananchi kwamba kuna kiasi cha kutosha cha sarafu za shilingi 500 nchini na kwamba kununua sarafu hiyo kwa bei ya juu kuliko thamani yake ni kujiingizia hasara,” alisema mkurugenzi huyo.

posted by rashid hamza

Vurugu Burundi: Mitandao ya Kijamii Ikiwemo Facebook,Twitter,Whatsapp Yafungwa

Vurugu Burundi: Mitandao ya Kijamii Ikiwemo Facebook,Twitter,Whatsapp Yafungwa

MAMLAKA nchini Burundi zimekata mawasiliano ya mitandao ya kijamii kupitia simu za mkononi, ambayo yamekuwa yakitumika kupanga maandamano ya kumpinga Rais Pierre Nkurunziza.

 

Mamia ya waandamanaji wako barabarani kwenye mji mkuu wa Burundi, Bujumbura kwa siku ya nne jana wakipinga uamuzi wa Nkurunziza kuwania urais kwa muhula wa tatu.

 

Mawasiliano hayo ni kupitia mitandao ikiwamo ya Facebook, Whatsapp, Twitter na Tango huku kituo kikuu binafsi cha redio kikiwa kimefungwa katika harakati za Serikali kuzuia kuenea kwa ujumbe unaohamasisha maandamano.

 

Mitandao ya jamii imekuwa ikitumika kuratibu maandamano hayo ambayo ni makubwa zaidi nchini Burundi tangu kumalizika kwa vita vya wenyewe kwa wenyewe mwaka 2005.

 

African Public Rasio, maarufu kama ‘Sauti ya Wasio na Sauti’, ni moja ya vituo vitatu vya redio ambavyo matangazo yake ya moja kwa moja yamesitishwa, kwa kile Serikali ilichodai kuwa vinavuruga amani.

 

Nkurunziza, kiongozi wa zamani wa waasi ameonya kuwa yeyote anayetaka kusababisha matatizo kwa chama tawala atajiweka mwenyewe matatani.

 

Watu watatu wameuawa tangu Jumapili wakati polisi walipoutawanya umati kwa risasi za moto huku makumi kwa maelfu wakiikimbia nchi.

 

Chini ya Katiba ya Burundi, marais wanaweza kuchaguliwa kwa mihula miwili , lakini washirika wa Nkurunziza wanasema muhula wake wa kwanza hauhesabiki kwa vile aliteuliwa na Bunge.

 

Nkurunziza yu madarakani tangu mwaka 2005, wakati vita vya wenyewe kwa wenyewe vya miaka 12 vilipomalizika rasmi.

 

Watu zaidi ya 300,000 waliuawa katika mgogoro huo baina ya jeshi lililodhibitiwa na Watutsi walio wachache na makundi ya waasi wa Kihutu kama vile CNDD-FDD la Nkurunziza.

 

chanzo Mpekuzi blog 

 

posted by;rashid hamza

IRAQ: Wapiganaji 91 wa Kundi la Dola la Kiislamu (IS) Wauawa

IRAQ: Wapiganaji 91 wa Kundi la Dola la Kiislamu (IS) Wauawa

WAPIGANAJI 91 wa kundi la Dola la Kiislamu (IS) wameuawa na jeshi la Iraq lililokuwa likisaidiana na wapiganaji wa kujitolea katika sehemu mbalimbali huko nchini Iraq.

Wapiganaji hao waliuawa katika matukio mawili tofauti wakati vikosi vya jeshi la Iraq vilipokuwa vikipambana na wapiganaji hao.

Vyombo vya habari nchini Iraq vimetangaza kuwa Wizara ya Ulinzi ya Iraq imetoa taarifa kuwa vikosi vya Iraq vimewaua wapiganaji 61 wa kundi la IS  na kuteketeza maficho manne ya wapiganaji hao.

Taarifa hiyo imesema kuwa magari manne ya kijeshi ya wapiganaji wa kundi la IS yajulikanayo kama Humvee ambayo yalikuwa yamesheheni silaha za milipuko pamoja na malori sita yaliyokuwa na silaha yameteketezwa.

Jeshi la Iraq na vikosi vya kujitolea vilifanya operesheni hiyo dhidi ya kundi hilo katika mji wa al Karmah umbali wa kilomita 16, kaskazini mashariki mwa Fallujah.

Mkoa wa Fallujah ni miongoni mwa mikoa ambayo imekumbwa na machafuko wa al-Anbar.

Katika tukio jingine tafauti vikosi vya Iraq vimewaua magaidi 30 wa kundi hilo na kutegua bomu moja lililokuwa limetegwa katika lori wakati vikosi vya Iraq vilipokuwa vikipambana na magaidi hao katika mji wa Ramadi.

Mji wa Ramad upo umbali wa kilomita 110 magharibi mwa Baghdad mji mkuu wa Iraq

chanzo mpekuzi blog

 

posted by rashid hamza

CLOUDS

CLOUDS FM YASHINDA TENA TUZO YA UBORA YA SUPERBRAND KWA MARA YA TATU AFRIKA MASHARIKI.

 Picha ya pamoja ya baadhi ya makapuni binafsi waliopewa tuzo bora za
viwango,kutoka shoto ni Bi.Dorothy Mashamsham kutoka kampuni ya Mafuta
ya PetrolFuel,Mkurugenzi Mtendaji wa ITV/Radio One Bi Joyce
Mhaville,Mkurugenzi wa Uzalishaji na Vipindi Clouds Media Group Bwa.Ruge
Mutahaba,Meneja Masoko Bwa. Elisa Ernest kutoka kampuni ya bima ya
Alliance Insurance.

 Mkuu wa Kitengo cha Idara ya Uchambuzi wa viwango Afrika Mashariki,Bwana
Jawad Jaffer akiwa na baadhi ya viongozi wa juu wa kampuni ya Clouds
Media Group,kutoka kulia ni Mkuu vipindi wa Clouds FM Sebastian
Maganga,wa tatu ni Mkurugenzi wa vipindi na Uzalishaji Ruge Mutahaba na
Mkuu wa kitengo cha huduma,Promosheni na Tamasha Clouds Media Group.Bi
Fauzia Kullane.

 Mkuu wa Kitengo cha Idara ya Uchambuzi wa viwango Afrika Mashariki,Bwana
Jawad Jaffer akimkabidhi tuzo bora ya viwango Mkurugenzi wa Uzalishaji
na vipindi wa Clouds Media Group,Bwa. Ruge Mutahaba,kwenye hafla fupi ya
utoaji tuzo bora za viwango hizo iliyofanyika ndani ya hotel ya Hyatt Regency jijini Dar.

 Mkurugenzi wa Uzalishaji na Vipindi Clouds Media Group,Ruge Mutahaba akizungumza jambo  na Mkuu
wa Kitengo cha Idara ya Uchambuzi wa viwango Afrika Mashariki,Bwana Jawad Jaffer.

 Mkurugenzi wa Uzalishaji na vipindi wa Clouds Media Group,Bwa. Ruge Mutahaba akiishukuru taasisi
ya SUPERBRAND East Africa mbele ya wageni waalikwa na waaandishi wa
habari kwa kutambua ubora wa kituo cha redio hiyo na kuipa tuzo bora za
viwango katika Afrika Mashariki kwenye hafla fupi ya utoaji tuzo hizo
iliyofanyika ndani ya hotel ya Hyatt Regency jijini Dar.

 Baadhi ya Wageni waalikwa na wanahabari wakifuatilia jambo kabla ya utoaji
tuzo bora za viwanga a.k.a SUPERBRAND kwa makampuni binafis nchini
Tanzania.

Mkurugenzi wa Uzalishaji na Vipindi kutoka Clouds Media Group,Ruge Mutahaba akiwa amepozi na Mtangazaji wa ITV Bwa.Godwin Gondwe

 

…………………………………………………………………………….

KAMPUNI ya Clouds Media Group imeendelea kuwa kinara kwa ubora wa SuperBrand kwa mara ya tatu katika nchi za Afrika Mashariki.

 

 Mkuu wa Kitengo cha Idara ya Uchambuzi wa Viwango Afrika Mashariki,Jawad
Jaffer amesema kuwa matokeo ya utafiti huo ulizingatia maoni ya watalaam
wazoefu wa masoko na walengwa wa huduma za bidhaa ambao wanahaki ya
kuamua aina ya haki ya viwango bora vya superbrands na kupongeza
makampuni ambayo yamefanikiwa kuingia 20 bora.

 

Utafiti
huo umefanywa na idara ya uchambuzi wa viwango  makao makuu nchini
Uingereza kutokana na kuzingatia ushauri wa wataalam wa masoko  na maoni
ya watumiaji bidhaa zaidi ya 600 wa huduma hizo.

Amesema kampuni nyingi zilizoingia katika ubora wa superbrands ni 1000
zikapambanishwa na kufanya kampuni 20 ziingie katika ubora superbrands
na kufanya kampuni Clouds Media Group kuendelea kushikiria nafasi ya
jsu  kwa mwaka wa 2015 -2016.

 

POSTED BY; RASHID  HAMZA

RAISI KIKWETE

Rais Kikwete Azindua Meli Mbili Za KIVITA Kwa Kishindo Jijini Dar

RAIS Jakaya Kikwete, jana amezindua na kuzitunukia Kamisheni meli mbili za kivita za Jeshi la Ulinzi la Wananchi wa Tanzania Kamandi ya Wanamaji ambazo zitatumika kufanya doria na kulinda mipaka ya majini katika Bahari ya Hindi.

Meli hizo zimepewa majina ya P77 Mwitongo na P78 Msoga zenye urefu wa mita 60 na zina uwezo wa kufanya doria katika kina kirefu cha maji.

Rais Kikwete alisema, kupatikana kwa meli hizo kumeifanya Tanzania kuandika ukurasa mpya wa uhusiano kati yake na China ambao uliasisiwa na waasisi wa mataifa hayo hayati Mwalimu Nyerere na Mao Tse Tung.

Alisema meli hizo zimekuja nchini kwa msaada wa Serikali ya Watu wa China zikiwa na uwezo wa kubeba silaha nzito kila moja ikiwa na mizinga miwili mikubwa na midogo sita.

"Jeshi letu la Wanamaji wakati linaanzishwa 1971, lilisaidiwa na Serikali ya China meli 13, rada na wataalamu wetu kupatiwa nafasi mbalimbali za mafunzo...meli hizi zitatuongezea ulinzi katika mipaka yetu majini.

"Kilio kikubwa cha jeshi letu kilikuwa uwezo mdogo wa meli zetu, tumekuwa na kazi ya kutafuta meli hizo na sasa tuna mpango wa kuchukua meli nyingine kubwa zaidi zenye uwezo, kilichobaki ni taratibu za kifedha tu," alisema Rais Kikwete.

Aliongeza kuwa, lazima Tanzania ijenge uwezo wa kulinda mali zetu, mipaka, samaki na mitambo ya gesi ambayo imesimikwa baharini hivi karibuni.

Kwa upande wake, Waziri wa Ulinzi, Dkt. Hussen Mwinyi, alisema Serikali ya China imekuwa msaada mkubwa kwa Tanzania.

Mkuu wa Majeshi ya Ulinzi, Jenerali Davis Mwamunyange, alisema jeshi hilo limepiga hatua katika ununuzi wa dhana za kivita na kuendeleza mafunzo ya kijeshi.

Amiri Jeshi Mkuu Rais Jakaya Mrisho Kikwete akikagua mara baada ya kuzindua rasmi meli vita mbili za doria bahari kuu TNS Msoga na TNS Mwitongo kwenye sherehe zilizofanyika Kamandi ya Jeshi la Maji Kigamboni jijini Dar es salaam jana April 28, 2015

Amiri Jeshi Mkuu Rais Jakaya Mrisho Kikwete akipata picha ya kumbukumbu na makamanda wa meli vita mbili za doria bahari kuu TNS Msoga na TNS Mwitongo kwenye sherehe zilizofanyika Kamandi ya Jeshi la Maji Kigamboni jijini Dar es salaam jana April 28, 2015

Amiri Jeshi Mkuu Rais Jakaya Mrisho Kikwete akisalimiana na Chifu Edward Wanzagi wa kabila la Wazanaki (kati) pamoja na Mbunge wa Afrika Mashariki Mhe Makongoro Nyerere baada ya kuzindua rasmi meli vita mbili za doria bahari kuu TNS Msoga na TNS Mwitongo kwenye sherehe zilizofanyika Kamandi ya Jeshi la Maji Kigamboni jijini Dar es salaam jana April 28, 2015.

 

(PICHA NA IKULU)

 

POSTED BY;RASHID HAMZA

KIGOMA YETU

Majambazi Matatu (3) Yauawa na Jeshi la Polisi Mkoani Kigoma

JESHI  la Polisi Mkoani Kigoma limefanikiwa kuuwa majambazi watatu baada ya kurushiana risasi na kukamata silaha mbalimbali za kivita.

Akizungumzia tukio hilo ofisini kwake Kamanda wa Polisi wa Mkoa wa Kigoma,Kamishna Msaidizi Mwandamizi wa Polisi (SACP) Frednand Mtui alisema kuwa majira ya saa nane usiku katika eneo la  mto kahabwe mpakani mwa Wilaya ya Kakonko na Kibondo, askari Polisi wakiwa doria walirushiana risasi na majambazi ambao idadi yao haijajuikana na kufanikiwa kuwauwa majambazi watatu.

Alisema wamefanikiwa kukamata silaha moja aina ya AK.47 yenye namba 10363 ikiwa na risasi 11 ndani ya magazine na risasi 22 za SMG ndani ya mfuko wa rambo pamoja na mabomu 2 ya kutupa kwa mkono .

Kamanda Mtui alisema kuwa aina ya mabomu waliyokutwa nayo majambazi hao ni offensive handgrenade namba Y.3PM-2 na jingine ni aina  ya deffensive handgrenade ambalo namba zake hazisomeki.

''Leo ilikuwa ni siku ya mnada hivyo inaonekana majambazi hao walijipanga kwenda kupora mali na pesa katika mnada wa leo,tunawashukuru raia wema kwa kutoa taarifa mapema na kufanikiwa kuwanasa majambazi hao na kuwauwa''alisema Kamanda Mtui

Alisema maiti za majambazi wote watatu ambao majina yao hayajafahamika ila wote wana umri kati ya miaka 25-35 zimehifadhiwa katika Wilaya ya Kibondo na upelelezi wa tukio hilo unaendelea.

POSTED BY; RASHID HAMZA